RSS

Tussen de regels deur

02 Dec
Eltje Doddema

Eltje Doddema

n Beagle van 18,5 cm keek mie, mit zien tonge haalf uut de bek, vanòf n stellen meewoareg aan. t Was net of hai mitkregen haar dat ik mie net vrij wurgd haar uut n kolonne rolstoulen en rolloators; n optocht van grieskoppen mit steuters dij t op dizze nommerdag in de kop kregen haren om in n toensentrum n file te veroorzoaken van de kategorie “stop and go”.

De vraauw en ik haren t in de kop kregen om op dizze middag nog achter wat kerstraive aan te goan. Wie dochten n strategisch tiedstip uutkozen te hebben: onder schoultied en nait op n middag dat ter n workshop “kerststokjes moaken” organizeerd wer. n Middag dat je mit joen aigen kare frank en vrij en van links noar rechts manoeuvrerend joen aigen gang goan konden. Mor wie kwamen dus bedrogen uut. n Strategische miskleun, zo te zeggen.

“Vin jij deze wel schier, Hennie?” n Vraauw in n rolstoule wees op n schoaltje mit kouschietengruine kerstbalen. n Mizzelke kleur woar je op Twijde Kerstdag n modderfiguur mit sloagen zollen as je, ainglieks tegen joen zin in, de femilie nuigd hebben veur wat rakletterij. De steutster van de rolstoule achter heur gaf n antwoord. Mor dij ging volledeg ten onder in de kakafonie dij veurtkwam uut de twijwielers rondom. Nee, schier von ik dij schietkleur nait, net zo min as aal t aandere dioakenraive dat veur n habbekrats in propvolle kontainers vanòf d’aandere kaande van de wereld importeerd was. Man, man, wat ter toch nait aal moakt wer.

Ik haar t wel bekeken en perbaaierde de vraauw te ontwoaren dij stoeken bleven was tussen n koppel grommen dij aal roupend en rerend hìnter en twìnter deur t toensentrum bounderde. Deur aal dat fileleed was t al zo loat worden dat ook t jonkgoud der veur zörgde dat de gangpoaden zo vol wuiren as n potje mit peren.

Ik keek nog ais achterom. Ik haar t idee dat dij stainen beagle van € 21,50 mie uutlagde. Mor dat zol wel verbeelden west wezen, veurtkommende uut onmacht en frustroatsie. Was k mor bie mien aigen beagle thuus bleven. Aine van elf kilo en de rust zulve.

Beagle mos je wezen…….. Beagle

Advertenties
 
11 reacties

Geplaatst door op 2 december 2016 in Columns, Eltje Doddema

 

Tags: , , , ,

11 Reacties op “Tussen de regels deur

  1. fietszwerver

    2 december 2016 at 08:22

    en zeker met lege handen thuis gekomen 🙂

    Liked by 1 persoon

     
    • Gusta Weber

      2 december 2016 at 11:06

      Nou, mie dunkt dat de vraauw wel weer n elandje skoort het. Zo aine woar n diskobaale bie verblaikt.

      Liked by 1 persoon

       
      • eltjedoddema

        2 december 2016 at 11:10

        Mien overtugenskracht was dit moal slim groot………

        Like

         
    • eltjedoddema

      2 december 2016 at 12:12

      Wie kregen wel n bonnetje mit………..

      Like

       
  2. Gusta Weber

    2 december 2016 at 11:13

    Aine van mien mooiste Grunnerger woorden: kouschietengruin! Joaren leden heurd van Kees Visscher (de pa van…), dei haar t over n kouschietengruine karavan. Ik laagde mie de buutse oet.
    Pee Es: n poar aandere schiere woorden dei mie nou in t zin schaiten: snoetjeknoffelen en kounavvel.

    Liked by 1 persoon

     
  3. Gusta Weber

    2 december 2016 at 21:54

    Hmmm… zol t eerlieks nait waiten. Dut mie denken aan ‘hansopje’, soort van nachtgoud aan ain stuk?

    Like

     
  4. Gusta Weber

    2 december 2016 at 22:20

    Nooit te old om wat neis te leren.

    Liked by 1 persoon

     
  5. Gusta Weber

    3 december 2016 at 08:48

    en utermoate belangriek!

    Liked by 1 persoon

     

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit / Bijwerken )

Twitter-afbeelding

Je reageert onder je Twitter account. Log uit / Bijwerken )

Facebook foto

Je reageert onder je Facebook account. Log uit / Bijwerken )

Google+ photo

Je reageert onder je Google+ account. Log uit / Bijwerken )

Verbinden met %s

 
%d bloggers liken dit: